GV 2011
Jungschützenbericht 2010
Am 17. März isches de ume mou so wit gsi wo mir üs füre erscht Theorieobe am 8 i im Schützehus troffe hei.
Sibe Jungschütze und 4 Jugendlechi hei am disjährige Kurs teilgno mit drbi üse jüngscht
dr Amstutz Brayan är isch hüür grad mou 12 Jährig worde.
Mir hei wie aui Johr s` Pflichtprogramm vom Kurs und Vereinsmeischterschaft gschosse.
Am 5. Juni hei mir de zerschte uswärtige Schiesse bestritte nämlech z Fäudschiesse
z` Schünebärg. Mit 9 vo 11 Kränz umene Finalteinämer si mir de ume zrugg uf Diessbä gfahre. Dr L `Heureux Christian mit 65 Punkt het de am Sundi leider am Final nid chönne teilnä ihm trotzdäm härzlechi Gratulation zu däm super Resultat .
Zwüsche düre hei mr de müesse Qualifikation für as Eidgenössische Schützefescht in Aarau schiesse.
I bi de mit üsne Qualifizierte Juniore am Fuhrer Nick, Müller Silvan und em Müller
Marc- André am 12 Juni am Morge nach Schönbühl is Sang gfahre für die letschti Träningseinheit s`absolviere. Vo de Jungschütze hets für Teilnahm am Eidgenössische leider keim möge länge.
Dene dreine härzlechi Gratulation für Qualifikation am Tag der Jugend am
Eidg. Schützefescht 2010 in Aarau.
Am Nomitag si mir de uf Büre as Jungschützewettschiesse, dasmou hei 6 vo 11 mit emne Kranz chönne uszeichnet wärde. Die beschte Resultat hei dr Beck Dominique mit 55 P und Frei Annina mit 53 P erziut dr bescht Junior äbefaus mitemne Kranzresultat isch dr Fuhrer Nick mit 48 P gsi.
Wider die gliche drei Juniore hei sech ou hie wider Qualifiziert für a Seeländisch Jungschützetag in Arch und zwar mit em 6. Rang dr Fuhrer Nick wie scho erwähnt mit 48 P
dr Müller Marc-André ufem 8. Rang mit 45 P und ufem 9. Rang dr Müller Silvan mit 44 P.
Am 20 Juni am Morge am viertu ab füfi hei mr de mit üsne dreine Juniore abgmacht gha für a schliessend nach Kallnach zur Firma Marti zfahre. Aber bevorme het chönne Fahre hei o zersch au müesse uuf und vorauem wach si.
Aber trotz däm Weckdienscht hei mir pünktlech am sächsi dr Wäg mit em Car nach Aarau unger d Reder gno so dass mr de am 8 i zum Schiessbeginn hei chönne a vo.
Gsammthaft hei 399 Juniore us dr ganze Schwiz am Wettkampf teilgno.
Üse bescht Junior dr Müller Marc-André isch ufe 271 Rang klassiert worde dr Fuhrer Nick uf Rang 348 und dr Müller Silvan uf Rang 351.
Äs isch für au drei äs grosses Erläbniss gsi u wird sicher ou i gueter Erinnerig blibe.
Nach de Summerferie am 14. Ougust hei mir dr Jungschützekurs mit dr Vereinsmeischterschaft wider a gfange d Resultat do dr zue chöit dr uf dr Ranglischte entnä.
Am 4. Septämber isch dr Häni Fritz wägä mire Abwäseheit mit dr Frei Annina am L`Heureux Christian und dene dreine Juniore uf Arch a Seeländisch Jungschützetag gfahre. Für d Juniore isch das Schiesse dr Finau gsi für D Jungschütze Qualifikation für as Kantonale in Lyss.
Zersch aber zu de Resultat vo de Juniore . Ufem hervorragende 6. Rang dr Müller
Marc- André mit 84 P ufem 23. Rang dr Müller Silvan mit 75 P und ufem 26. Rang dr
Fuhrer Nick mit 74 P gsammthaft hei 45 Juniore Teil gno gha.
Zu de Jungschütze dört het sech dr L`Heureux Christian ufem 20. Rang mit 83 P für as Kantonale Qualifiziert. Da är aber verhinderet isch gsi isch d Frei Annina ufem 21. Rang äbefaus mit 83 P nochegrütscht und somit het Sie am Kantonale z Lyss chönne Teilnä.
Am 18. Septämber Si mr de gägä Lyss gschtartet vo 125 Jungschütze vom ganze Kanton Bärn gschosse hei. D Annina isch mit irne gschossne 84 P ufe 83. Rang cho.
Am 3. Oktober hei ou äs paar Jungschütze am Usschiesse teilgno so das mr de am Mittwuch druf bim Kessler Ueli ir Wärchstatt hei chönne go Gwehr putze.
Dr Jungschützeschlussobe het natürlech ou i däm Johr nid dörfe fähle am 9. Oktober am haubi achti hei mr dä gmüetlech mit emne Apero i gschtumme.
A dere steu möcht i im name vo de Jungschütze am Wälti Kurt und am Wittwer Karl viu mou merci säge für ihri Spänd i d Jungschützekasse merci viu mou.
Dank dene Spände ha i a däm Obe die beschte Räng mitemne schöne Pris dörfe uszeichne.
Ufem erschte Rang isch dr L`Heureux Christian mit 305 P gsi ufem zwöite Rang d Frei Annina mit 303 P und ufem dritte Rang Fankhuser Melinda mit 292 P. Dir gset auso äs isch ar Spitze ganz knapp worde. Dr Jungschützeschlussobe het de mitemne Pockerspiu am Morge einisch gändet.
Dir gset auso mir hei ou das Johr wider äs usgfüuts Programm ga das het ou dr Schädeli Res gmerkt wo ig ihm doch nume no grat 175 Schuss ha chönne umegä. Dr Kurs het im Johr 2010 3825 GP 90 verschosse a dere Steu möcht i mi bi mim Heufsleiter am Häni Matthias für sini mithiuf im Kurs bedanke. I möcht aber ou aune merci säge wo irgend öbis füre Jungschützekurs gleischtet hei üsem Wirte Paar René und Isabelle für Bewirtig ade Kurstage am Kessler Ueli für benützig vor Garage für d `Gwehr z`putze und am Wälti Kurt und Wittwer Karl für Spänd i d Jungschützekasse merci aune viu mou.
So jetz bini am Schluss vo mim Bricht a glangt i wünsche Euch aune Gueti Gsundheit und Guet Schuss im Johr 2011
Dr Jungschützeleiter
