GV 2008
Bericht 2007 des Jungschützenleiters
Für mi het dr Jungschützekurs eigentlech scho vor dr GV agfange gha.I ha de so Mitti Februar äs Schribe füre Kurs 07 verschickt. Da i aber no nid aus Jungschützeleiter gwäut bi gsi, hani nid genau gwüsst ,ob i die Arbeit jetz für ne Angere oder für mi erlediget ha.
Nach drei Wuche isch de dr Amäudeschluss düre gsi, u Ig respektiv mir hei de mit däm Kurs am Zischtig dr 20. März 07 mit dr Theorie im Schützehus chönne starte.
Mit mir meini dr Häni Rene und ig är het mi dür das erschte Amtsjohr chräftig ungerstützt u mir die nötige Infos u Êrfahrige wo är gmacht het witergä. A dere Steu möchte i dir Rene rächt härzlech danke für dini Ungerstützig ,merci.
Am 7. April heimer de ds erschte mou gschosse ,und ä Wuche druf am 14. April isches de scho zerschte mou um öbis gange. Mir hei nämlech mit dreine Gruppe a dr erschte Rundi vo gsammthaft vierne, vo dr Bärnerische-Gruppemeischterschaft für Jungschütze Teil gno.
So für ds erschte mou isches gar nid schlächt gloffe, obschon mr hei müesse merke, dases no angeri Gruppe het gha. Mir hei nach dr erschte Rundi mit dr erschte Gruppe dr Rang 182 mit dr zwöite dr Rang 292 u mit dr dritte dr Rang 316 beleit gha. Gsamthaft hei 322 Gruppe gschosse gha.
Mir hei auso gseh ,dass mr üs no chlei sötte steigere, u so heimer üs dere Ufholjagd gwittmet und äs het sech glohnt. Gruppe eis het sech vom 182 ufe 113 Rang fürekämpft. Gruppe zwöi vom 292 ufe 147gischt und Gruppe drü vom 316te ufe 157giste Rang. Dir gseht auso, mir hei veiechlei chönne ufhole gägenüber dr erschte Rundi.
Am 18. Mai hei mr dr Fäudschlösslistich gschosse dört ha i füf Jungschütze mit emne Kranz chönne uszeichne.Bravo!! Bi de drü beschte Resultat heimer dr Häni Matthias mit 68 Punkt gfougt vom Sütterlin Roman mit 60 Punkt u dritt mit 58 Punkt üse Junior dr Schädeli Fabian a dere Steu mou härzlechi Gratulation.
Zwüsche düre hei mr de d Vorüebig Fäudschiesse gschosse, bevor mr de am 2. Juni uf Busswil a z Fäudschiesse gange si. O dört hei wider füf chönne uszeichnet wärdä u zwar dr Häni Matthias mit 60 Punkt, dr Läderach Michael , und dr Ruch Florian mit 59 Punkt dr Witschard Thomas mit 57 Punkt und dr Sütterlin Roman mit 56 Punkt.
D Wuche druf am 9. Juni het de z Jungschützewettschiesse in Leuzigen statt gfunge. Äs het dört zwe Kategorie gha und zwar Juniore und Jungschütze.
Bi de Juniore hei 12 Schütze gschosse ,ungerangerem üse Junior dr Schädeli Fabian. Är het dr 4 Rang mit 49 vo 60 mügleche Punkt chönne belege u sech somit füre Seeländisch Jungschützetag Schüpfe qualifiziert.
Bi de Jungschütze hei 41 gschosse ufem dritte Rang isch dr bescht Jungschütz vo üs dr Ruch Florian gsi, är het 54 Punkt vo 60 mügleche erziut. i grattuliere am Schädeli Fabian und em Ruch Florian no mou rächt härzlech für die guete Resultat. Witer hei mr dr Rang 10,11,12 mit em Schwamberger Adrian, Witschard Thomas und Häni Matthias mit je 50 Punkt chönne belege.
Nach däm zimmlech aktive Programm hei mir üs i d Summerferie begä bevor mir üs de ufe nöchscht Wettkampf hei chönne vorbereite.
Am 11. Augschte si mr de zu de Kappeler Jungschütze gfahre für üse Traditionell KA-DI Cup dürezfüere, besser gseit für üse Titu z verdeidige. Diessbacher hei nämlech no ei Sig brucht das dr Wanderpris wo mir hei iz Eigetum übergeit. Äs isch de so cho wie mir üs das Gwünscht hätte mir hei mitemne chline Vorsprung im Sack chönne hei fahre. Da dr KA-DI Cup usere vor und Rückrundi besteit, hei mir gwüsst das mir nid chöi zrugg länä, sondern das mr üs z Diessbach no mou glich wie z Kappele müesse a stränge. Am 8. September si de Kappeler zu üs uf Diessbach cho. Aber ir Zwüschezit hei mr bim KA-DI Cup ä chlini Pouse müesse i lege da beid Kürs am 1. September am Seeländische Jungschützewettschiesse in Schüpfe hei müesse presänt si.
Und so si mir a däm Tag uf Schüpfe gfahre as Seeländische Jungschützewettschiesse , mit mir meini dr Schädeli Fabian, Sütterlin Roman, Ruch Florian und dr Häni Matthias.
Äs hetsech de dört zeigt, dases doch langsam bi deune chlei a dä Närve avot zucke , äs isch nümme aune so guet gloffe. Die beschte 16 vo de Jungschütze und die beschte 15 vo de Juniore heisech nämlech füre Kantonali Jungschützetag in Reconvillier chönne qualifiziere.
Dr Häni Matthias het sech aber chönne düresetze usech mit em 3. Rang mit 89 Punkt vo mügleche 100, für nach Reconvillier qualifiziert. Härzlechi Gratulation.
Ufem 49. Rang isch dr Ruch Florian gsi und ufem 69. Rang dr Sütterlin Roman gsammthaft hei z Schüpfe 79 Jungschütze teil gno.
Dr Schädeli Fabian het dr 35. Rang mit 63 Punkt beleit dört hei 40 Jugendlechi gschosse. Dä Tag isch de nach dr Rangverkündigung langsam usklunge und mir hei üs bereits uf ds fougende Wucheänd müesse konzentriere denn d Rückrundi vom KA-DI Cup isch ufem Programm gstange.
Mir hei de am 8. September am haubi zwöi d Kappeler bi üs z Diessbach chönne begrüesse. Mir hei gschosse d Spannig isch sehr gross gsi wär äch jetz us Siger hei geit. Nach em Wettkampf simer de wie z Kappele o no chlei zum zimmis zäme ghocket mit Steak und Hörnlisalat hei mir däm Nomittag no die richtigi chuscht gä. Für das mir de ou öpis z Ässe hei gha bruchts geng öper wo das macht. I wett mire Frou dr Barbara härzlech danke, dass Si üs dä guet Salat het gmacht, und aune wo mir a däm Tag gufe hei . A schliessend simer de zur Rangverkündigung glangt. Und zwar hei mr ufem erschte Rang dr Häni Matthias mit 111 Punkt gha ufen zwöite ä Kappeler Jungschütz mit 105 und ufem dritte dr Schwammberger Adrian mit 98 Punkt. U de simer zum Grupperesultat cho JS-Kappelen 645 Punkt git ä Schnitt vo 92.14 Punkt JS-Diessbach 659 Punkt git ä Schnitt vo 94.14 Punkt und so isch dä Wanderpris i üses Eigentum übergange. A dere Steu möcht i mi bim Flückiger Peter rächthärzlech bedanke ,är het üs nämlech die erschte drei Prise und dr neu Wanderpris gschbändet merci viu mou Peter.
Am 15. September isch de no S Kantonale vor dr Tür gschtange u de bini mit em Matthias nach Reconvillier gfahre dört hei 135 Jungschütze vom Ganze Kanton Bern teil gno, dr Matthias het dr 27. Gang mit 90 vo mügleche 100 Punkt beleit. A dere Steu möcht i am Matthias nomou für das guete Resultat gratuliere.
Am 10. November hei mir de dä Kurs mitemne Jungschützeschlussobe beändet.
Mir hei jo ou no ä Jüngschütze Vereinmeischterschaft dürs ganze Johr gschosse
D Siger vom Johr 2007 si uf em 1 Rang Häni Matthias mit 318 Punkt 2. Rang Ruch Florian 292 Punkt und ufem dritte Rang üse Junior dr Schädeli Fabian mit 280 Punkt dene dreine härzlechi Gratulation vo mire Site.
Jetz chume iz langsam zum Schluss ,dir gseht das bi üs im Kurs veiechlei öbis gange isch.
I wett am Rene nomou merci säge das är mir i däm Kurs ghufe het ,am Flückiger Peter für die Spänd vo de Prise, am Helmut und dr Frida für die Bewirtig a üsne Kurstage und aune wo mir i däm Jungschützejohr uf irgend welchi Art ghufe hei merci viu mou .
I wünsche aune im Johr 2008 Guet Schuss
Dr Jungschützeleiter
