GV 2012
Jungschützenbericht 2011
S`Johr 2011 isch bi üs im Kurs äs sehr bewegts Johr gsi. Am 16. März hei mir üs zerschte mou troffe für dä Kurs z`starte. I ha de im Schützehuus am achti föif Jungschütze und sächs Jugendlechi füre erscht Theorieobe dörfe begrüesse.
Nach em vierte Schiesstag isch de am 30. April s`Zimmisschiesse ufem Programm gsi. Nach de zwe Diszipline jede mit sim Gwehr 10 Schuss uf A10 und paar Schuss mit emne Luftgwehr kniend hei mir de dä gmüetlech Nomittag mitemne Steak umene Bier beändet.
Mir hei im Kurs wie au Johr d`Vereinsmeischterschaft, Bernergruppenmeisterschaft und JU+VE Programm gschosse.
Und so hei mir üs am 28. Mai de ufe Wäg gmacht für a ds`Fäudschiesse z`Busswil .Äs isch nid schlächt gange dr Schmid Timon isch a däm Tag mit 62P Tagessieger vo üsem Kurs gsi. Näbscht em Timon hei no witeri Jungschütze dr Chranz dörfe entgäge nä. Dr Müller Marc André mit 59P dr Fuhrer Nick und dr Stebler Dominic mit je 55P.
D`Frei Annina isch de am Sundi mit paar Aktivschütze uf Busswil gloffe. Nachemne Kaffee und Gipfeli het de d Annina mou wöue ablige und het das Programm gschosse.
Mit hervorragende 65P het d Annina dr Schmid Timon vom erschte Platz verdrängt und het sech drzue ou no grad füre Finau qualifiziert. Dört het si sech de gäge drei Mitbestritter müesse bewise, mit 66P isch si ufe hervorragend zwöit Rang cho und het somit ou dr Jungshützeleiter wo ufem dritte Rang isch gsi gmeischteret. Annina Dir nomou härzlechi Gratulation zu däm hervorragende zwöite Rang. Ufem heiwäg het me de hie und dört, no ä haut i gleit unger angerem ou im Bäre z`Büetige. Es het sech de so ergä das me mit em Wirt, am Leuenberger Hausi ä Diel het chönne dräie das är de Jungschütze füre Abschlussobe äs feins z`Nacht zumene choschtegünschtige Pris duet choche.
Am 11. Juni het z`Leuzigen s Jungschützenwettschiessen statt gfunge. Und ou dört het d Annina wider ä top leischtig zeigt usech mit 57P vo 60 mügleche dr erscht Rang gsicheret . I möchti Ihre a dere Schteu rächthärzlech zu däm erschte Platz gratuliere. Die nöchste Diessbacher ufem Rang 4 + 5 si de dr L`Heureux Christian und dr Fuhrer Nick mit je 54P gsi.
Nach de Summerferie am 27. Auguscht isch dr René mit meh aus em haube Kurs uf Bellmund a Seeländisch Jungschützetag gfahre. Und zwar hei sech vo de Juniore dr Fuhrer Nick , dr Görl Fabian , dr Dauwalder Marco und dr Gurtner Florian am Jungschütze Wettschiesse z Leuzigen Qualifiziert gha. D`Jungschütze wärde düre Jungschützeleiter fescht gleit, und so ha i mi für d Annina und füre Schmid Timon entschide. Bi de Juniore hei 28 Schütze teilgno. Üse bescht Junior dr Fuhrer Nick isch mit 82P ufe 10 Rang klassiert worde. Ufem 14 Rang mit 80P isch dr Gurtner Florian gsi ufem 17 Rang mit 75P dr Görl Fabian und ufem 24 Rang dr Dauwalder Marco mit 67P. Bi de Jungschütze hei 49 Schütze gschosse. D Annina hät sech mit em 15 Rang mit 85P für a Kantonau Jungschützetag in Spiez Qualifiziert gha het aber leider wägere Gschäftleche Abwäseheit müesse absägä. Dr Schmid Timon isch ufe 38 Rang mit 77P klassiert worde.
Ou dises Johr hei mir wider mitere Gruppe Jung & Aut am Amtsträffe Teilgno aber do dr zue het Euch dr Fuchs Herbert jo scho öbis verzeut.
Das Johr hei mir üs z`erschte mou im JU+VE Stich füre Finau am 17. Septämber z`Spiez chönne qualifiziere, u so ha i a däm Tag mit em L`Heureux Christian und em Fuhrer Nick dä Wäg unger d Reder gno. Äs si de beidi chlei närvös worde wo si die vile Schibe und Mitbewärber gse hei. Äs het ou wider zwe Kategorie gä bi de Juniore hei 43 gschosse und bi de Jungschütze 57. Dr Fuhrer Nick isch mit 120P ufe 30. Rang cho dr L`Heureux Christian mit 123P ufe 44. Rang. I möcht ou dene zwene rächthärzlech Gratuliere das si sech Qualifiziert hei für a däm Finau teil z nä.
Und so het sech üse Kurs 2011 langsam am Ändi zue gneigt. Nachem Lottomach und Usschiesse heimer bim Kessler Uli no Gwehr putzt so das mer am 15. Oktober üs im Schützehuus füre Jungschützeschlussobe hei chönne träffe.
Äs isch ä sehr gmüetleche Obe gsi. Nachem feine z`Nacht mit Hörndli u Gschnätzletem und Salat, wo wie scho erwähnt vom Bären Wirt kochet isch worde, ha i de d Rangverkündigung düregfüert. Aber i möchti vorewäg am Wälti Kurt viu mou Merci säge für die sehr schöni Spänd wo är üs i üses Kässeli gsponseret het. Dür das ha i die Rangverkündigung mit sehr schöne Prise dörfe dürefüere und d Jungschütze / Schützinne dörfe uszeichne, merci viu mou. Zu de Resultat, ufem erschte Rang vom Jungschützekurs 2011 isch gsi wie chönnts nid angers si d Frei Annina mit 334P. Dir gseht auso d Vervougig vom zwöite Rang vo dr letschte Saison het d Annina verloh. Aber nid nume das, die 334 erreichte Punkt, isch bis jetz ou die höchscht erreichti Punktzau wo je i dr Jungschützevereinsmeischterschaft vo Diessbach erziut isch worde. Annina zu däm erscht Rang u däm super guete Resultat möcht i Dir ou hie gratuliere und wünsche Dir i Dire witere Schiesskariere witerhin die Gueti Träffsicherheit und immer Guet Schuss.
Zu de angere Resultat, ufem zwöite Rang mit 306P dr Fuhrer Nick mit 305P ufen dritte Rang dr L`Heureux Christian und ufem vierte Rang mit 287P dr Schmid Timon. I möchti dene Prisgwinner aber ou de angere Jungschütze zu Ihrer Leischtig Gratuliere und vorauem merci säge das si so pflichtbewusst und immer mit disziplin a dene Kurstage hei teilgno.
Sit mängem Johr wird bi üs ouno dr bescht vom zwöite Kurs mitemne Wanderpris uszeichnet das heisst vom Kursprogramm wo vo Bund vorgä wird.
Und das isch das Johr dr Schmid Timon mit 206 Punkt gsi. I möchti ou Ihm für sini namentlechi verewigung uf üsem Wanderpris em UHU gratuliere.
Nach dr Rangverkündigung und em Dessär het de dä Obe mitemne Pokerspiu , am früeche Morge mou gändet.
Dir gset auso mir hei i däm Kurs äs strickts Programm gha und hei dä mit sehr guete Resultat chönne abschliesse. Das mir ä sörigi Kursgschicht mit settige Resultat i däm Johr chöi präsentiere isch sicher ou diä grossi mithiuf vo mim Hiufsleiter am Matthias z`verdanke. Är het mi ou dises Johr tatkräftig ungerstützt und ou sis wüsse mit i Jungschützekurs i brocht. Matthias i möchti mi für dini Mithiuf im Kurs rächthärzlech bedanke i hoffe das mir ou im nöchschte Johr dr Kurs wider zämä so chöi dürefüere. Äbefaus möcht i mi ou bi dä angere Vereinskollege wo mi dür z Johr düre ghufe hei rächthärzlech bedanke. Merci no mou aune viu mou.
So jetz bini am Schluss vo mim Bricht a glangt, i wünsche Euch aune für die kommendi Saison Gueti Gsundheit und GUET SCHUSS.
Dr Jungschützeleiter
Patrick Häni
