Du bist hier:  Berichte Kurs JS-Leiter  »  GV 2007

GV 2007

Bericht 2006 der Jungschützen

Am 8. April hei mer afo schiesse, im Schiessstand ds Diessbach. Es isch no nid aune Jungschütze guet gange und me het ou gmerkt, dass dr Serge mit so mängem Jungschütz, ou viu wo dr erscht Kurs hei gmacht, es bitzeli überforderet isch. Es wär villicht nid schlächt gsi, wenn er haut ou e Hiufsleiter hätti gha. I ha mi när de zur Verfüegig gsteut und er het das Angebot gärn agno. Jo nächhär hei mer dr ganz April eigentlich gäng am Samschti gschosse und me het gmerkt, dass es settigi het gha wo gäng besser si worde. Es het haut leider ou settigi derbi gha, wo äuä eifach si cho, für chlei furt d’ si vo Deheime und mau chlei blöd ztue. Im Mai hei mer dr Fäudschlösslistich gschosse. Dört hets gloub 3 Kränz gäh. Am 20. Mai simer uf Scheunenberg gange ads Fäudschiesse, dört isches üs nid schlächt gange, dert isch au dr ehemalig Jungschützenleiter dr René cho häufe. Im Juni si zwöi Schiessen uf em Programm gstange, ds Obligatorische und ds Jungschützenwettschiesse ds Büren. Ds Obligatorische hei mer nid chönne schiesse, wiu dr Serge gmeint het, me chönni das ufenes Üebigsblettli schiesse und nächhär das em Bund ischicke. Ja da dr Serge denn die Blettli nid het gha, isch die Üebig abbroche und verschobe worde. Am 1. Juni isch ds letschte Schiesse gsi über das i due schribe, denn simer uf Büren, für a ds traditionelle Jungschützenwettschiesse. Dert isches üs leider ou nid so guet glüffe, mir hei mit em 6. Rang abwärts sehr schlächti Räng müesse i chouf näh. Mir hoffe, das es das Johr besser geit und mir wider mit de vordere chöi mit mische. I dänke dases, das Jahr müglech wird si, da mer e sehr angaschierte Jungschützeleiter wärde ha und ou mir Giele dr Ergitz hei dert mou de Bürer Junschütze ds zeige, das nid nume sie chöi schiesse. Jitze wett i nümme lenger wärde mit mim Bricht. Zum Abschluss wett ig em Vorstand rächt härzlech danke, das si nach Serges Abgang hei reagiert und glich gluegt hei, das mir bis Saisonändi e Jungschützeleiter hei und vorauem, das d Saison nid isch früehzytig abbroche worde. Merci viumau.

Für die Jungschützen:

Matthias Häni

Bericht 2006 des Jungschützenleiters

Wie Dir vo mim Vorredner heit ghört het der Serge dä Jungschützekurs 2006 nid zändi gfüert. Ig ha scho zu Kurs beginn mehreri Telefon gha wiu är dä Kurs nid Gmude het gha, und miti Juli het mer du dr Jungschützeleiter vo Kappelen aglüte wägem Kadi-Cup. Är het dr Serge nid verwütscht, so hei mir, mit mir meineni dr Fritz und mi, probiert ä Wuche lang dr Serge zverwütsche, aber ou oni Erfoug. Mir hei du dä Kadi-Cup verschobe, und dr Fritz und ig hei churzfrischtig entschide dr Serge vo sine verpflichtige aus Jungschützeleiter zbefreie. So ha ni mi du däm Problem Jungschützekurs echlei agno und ha gluegt wo und wiemer de mit däm Kurs ou drin si, mini ermitlige hei ergä das vo däm Kurs no gar niemer öppis weis, weder dr Amts no dr Seeländer Jungschützechef und nid emou dr Schiessoffizier, so hani du sofort mit dene Lüt Kontak ufgno und dä Kurs uf mi Name nochegmude. Mi het ou Kappelen Kontaktiert und e nöie Termin abgmacht füre Kadi-Cup. Dr Kadi-Cup isch für mi du der erscht Schiesstag gsi und es isch gar nid so schlächt cho. Am 2. Septämber bini du mit 5 Jungschütze am Seeländische Jungschützetag im Schiessstang Almeli z Bellmung gsi. Es hei 72 Jungschütze gschosse, und die erschte 16 hei sech qualifiziert füre Kantonal Jungschützetag in Riedbach. Aber zersch zum Seeländische, mir hei nämlech es Super Resultat erzielt, und zwar het dr Häni Matthias mit 92 punkt vo mügleche 100 dr Erscht Platz beleit. Härzlechi Gratulation nomou! Am Kantonale ds Riedbach isches du nid ganz eso gloffe, aber mi isch jo ou afe chlei närvös worde, aber glich dr Matthias het mit 89 Punkt dr 52 Rang beleit vo insgesamt 138 Teilnämer. Mir hei no d Rückrundi vom Kadi-Cup Gschosse und Hei dr Sektions Pris chönne ds Diessbach bhaute, aber ou ider einzu Ranglischte hei mer dr Erscht Platz beleit und das wider mit em Matthias. Jetz hets scho wider gheise Gwehr Putze und Abgä, am 18. Oktober hei mir bim Kessler Uli ider Wärchstatt dörfe Gwehr Putze, nomou beschte dank das mir hei dörfe zu dir cho Uli. Am Samschtig obe druf hei mer no Jungschützeabschlussobe gha und so isch ou dä Kurs am ändi entgäge gange.
Dir heit ghört dä Kurs 2006 isch nid so ne eifache gsi und glich isches du no guet cho, ig bi aber zueversichtlech das dä 2007 besser und vo grund uf Organisierter wird use cho. Ig wet aune Danke wo öppis bi treit hei zum glinge vo däm haubwägs verunfaute Kurs. Am Flückiger Peter weti ou no spetzieu Danke, är het üs nämlech scho Prise füre Kurs 07 Organisiert Beschte Dank! Ig wünsche aune no e schöni Versammlig und spöter de e Guete.

Der Jungschützenleiter:

René Häni

Download Bericht 2006

Generalversammlung 2007: Jungschützenbericht des Jahres 2006 [11 KB]