GV 2013
Jungschützenbericht 2012
Bassend zum Jubiläumsjohr 20. Johr SG Diessbach hei mir am 14. März dr Jungschützekurs mit 20 Jungschütze mitem Theorieobe in Schützehuus eröffnet.
Bevor mir aber nach dr Theorie dr erscht Schuss vo dere Saison hei chönne schiesse, het ou das Johr am 24. März dr Waudsetztag vor Burgergmeind stattgfunge.
Sibe Jungschütze hei ä däm Tag d`Schütze verträte, nach viu Schweiss und gueter Verpflegig isches de Nomittag worde und die 2070 Jungpflanze hei ihre Platz im Waud i gno gha.
Wo mir de zwe Schiesstäg hingerüs hei gha si de am 14. April im Schützhuus und Schibestang diversi Arbeite ufem Programm gsi wo doch d Jungschütze o mitere schöne azau mitghuufe hei.
Nach däm Tag het me sech de witer am Kursprogramm gwitmet und so isch z Fäudschiesse am 2. Juni langsam aber sicher nöcher cho.
Trotz am Heimvorteu hets dürzogni Resultat gä aber äs hei doch 8 Jungschütze ä Kranz dörfe entgägänä.
Z` beschte Resultat het dr Müller Silvan mit 62 Punkt erziut gha ,gfougt vom Brunner Fabian mit 61 Punkt und Punkteglich mit 59 Punkt dr Schmid Timon und dr Müller Marc-André. Dene Kranzgwinner härzlechi Gratulation zu dene guete Resultat.
Vor de Summerferie si mr de mitti Juni uf Rüti as Jungschützewettschiesse gfahre.
Üse bescht Jungschütz dr Müller Silvan isch mit 83 P ufe 6. Rang klassiert worde und Fuhrer Nick mit 82 P het dr 8 Platz beleit gha.
Bi de Juniore isch dr Beck Pascal mit 81 P ufe 4. Rang cho .
Wäge mire Abwäseheit het dr Häni Fritz am 1. Septämber mit 2 Jungschütze und 4 Jugendliche dr Wäg nach Tschugg unger d Reder gno für mit ihne dört z`seeländische z beschtritte.
Bi de Jungschütze isch dr Meier David ufe 35 Rang cho und dr Gurtener Florian ufe 44 Rang.
Bi de Juniore 21 Rang Ramseier Marcel 23 Rang Beck Pascal 25 Rang Brignoli Luca und ufem 29 Rang Maurer Jeanne-Shopie.
Nachem Jubiläumsschiesse am 8. Septämber het sech de üsi Saison scho langsam am Ändi zue gneigt mir hei de no bin Kessler Uli Gwehr putzt und am Lottomatch tatchräftig mitguufe. Am 3. Novämber hei mir de üse tradizioneu Jungschützeschlussobe düregfüert. Nachemne feine Znacht het natürlech d Rangverkündigung nid dörfe fähle, dank äm Wälti Kurt ha i ou das Johr mine Jungschütze wider ä sehr schöne Pris dörfe überreiche. Kurt i möcht mi bi Dir nomou bedanke für dä schön Batze wo Du üs gspändet hesch merci viu mou. Ufem erschte Rang vom Kurs 2012 mit 324 P isch dr Müller Silvan gsi gfougt ufem zwöite Rang mit glichviu Punkt aber chlei euter si Brueder dr Müller Marc-André und ufem dritte Rang dr Furer Nick mit 321 Punkt. Dr bescht vom zwöite Kurs wo jo aui Johr mit üsem Wanderpris uszeichnet wird isch das Johr dr Marc-André mit 339 Punkt gsi.
So jetz bini am Schluss vo mim Bricht a glangt i möcht mi bi aune bedanke wo mi das Johr im Kurs ungerstützt hei bsungers bi mim Hiufsleiter am Matthias für sini tatkräftigi mithiuf im Kurs merci,jetz wünsche i Euch aune für die kommendi Saison Gueti Gsundheit und GUET SCHUSS.
Dr Jungschützeleiter
Patrick Häni
