GV 2010
Jungschützenbericht 2009
So mitti Februar hei mini Vorbereitige füre Jungschützekurs 2009 agfange.
I ha 55 Briefe a Giele und Meitschi vo Diessbach und Scheunenberg verschickt.
U so ha i am 18. März mit eim Junior zwöine Metili und dreine Giele dä Kurs mitem Theorieobe a gfange.
Wie i letscht Johr scho akündet ha, ha i dä Kurs chlei angers gstautet aus bishär.
D Jungschütze hei das Johr zganze Programm vor Vereinsmeischterschaft vo de Aktiv Schütze gschosse so dass si villech uf dr Ranglischte chlei besser mit me Resultat chöi do sto.
I ha scho zwee Schiesstage düre gha wo bi mir deheim plötzlech s Telefon glütet het, dr Arn Samuel vo Büetige het mi a gfrogt ob är äch nid no im Kurs chönnti mitmache.
Da mir jede Jungschütz chöi bruche wo freud am Schiesssport het ha i am dritte Schiesstag zwee Stung früecher mit ihm abgmacht und Theorie widerhout bevor mr de när die zwee erschte Schiesstage nochegschosse hei.
Wie scho gseit ha i die ganzi Vereinsmeischterschaft mit ne gschosse, damit i mi Bricht cha churzfasse oder s z'mingscht Probiere chöit Dir die einzelne Resultat de ir Ranglischte entnä.
Am 13. Juni hets Jungschützewettschiesse z Meinisberg stattgfunge, vo mine sibe Jungschütze hei vier chönne dr Kranz entgägä nä exgüsee nume zwee zwee Kränz si nämlech a üsi zwöi Meitli Melinda und Annina gange. Zu de Resultat L`Heureux Christian und Schädeli Fabian je 52 P Fankhauser Melinda 50 und Frei Annina 49 P dene Chranzgwinner härzlechi Gratulation.
Üsem Junior am Frei Silvan hets zwar mit 44P füre Kranz nid ganz wöue länge aber är hetsech füre Jugendfinal wo zäme mit em Seeländische Jungschützetag in Büre stattfindet chönne Qualifiziere ou ihm härzlechi Gratulation zu dere Qualifikation.
Am 27. Juni het Vorrundi vom KADI-Cup z Diessbach stattgfunge ou das Johr geit Diessbach mitemne chline Vorsprung de i d Rückrundi, mit öbisem z`Trinke und emne Steak hei mir de dä gmüetleche Nomittag beändet.
Nachere Summerpouse isches de am 15. Auguscht so witt gsi und dr Plauschwettkampf zwüsche Jung & Aut isch ufem Programm gstange. Äs het mi sehr gfreut das doch ä gwüssi azau Schützekoleginne und Kollege mitghufe hei. Mine Jungschütze wird dä Tag wo si mou miteme Karabiner und em 57 Sturmgwehr hei dörfe schiesse i gueter Erinnerig blibe si hei gmeint, das chöntme mou widerhole isch super gsi. I wett ou mine Häufer, am Kessler Uli Betreuig am Karabiner vorauem sehr intensivi betreuig bi de Froue wo mit ghufe hei am Häni Fritz är het 57er Stgw. betreut aber ou üsem Schützestubewirtepaar ar Isabelle und am Rene für das feine Steak und Hörndlisalat wo si für üses Zimmis zwäggmacht hei, merci viu mou.
Da ig i verhinderet bi gsi isch dr Häni Fritz am 5. September mit em Frei Silvan , L`Heureux Christian und em Schädeli Fabian uf Büren a Seeländisch Jungschützetag gange.
I ha de vom L`Heureux Christian per Sms erfahre wiss so gloffe isch. Dr Frei Silvan isch am Jugendfinau mit 76 P ufe 22 Rang vo insgesammt 37 Juniore cho.
Kategorie Jungschütze do het dr L`Heureux Christian 81 P erziut und isch somit ufe 29. Rang cho dr Schädeli Fabian mit 66 P ufe Rang 66 gsammthaft hei 74 Jungschütze gschosse.
Die beschte 16 Jungschütze heisech für ä s Kantonale chönne Qualifiziere für üs hets nid ganz wöue länge mi het drus glert dases haut amene Wettkampf nid immer glich louft wie de Heim im Träning.
Am 19. September isch d Rückrundi vom KADI-Cup gsi Diessbach gwinnt mit 403 Punkt vor Kappelen mit 390 Punkt. Ufem erschte Rang isch dr Lechenne Marc mit 106 Punkt ufem Zwöite Rang mit 104 P d Frei Annina und Punkteglich ufem dritte Rang dr Kräuchi Matthias.
Am 18. Oktober isch de z Usschiesse gsi ou äs paar Jungschütze hei dr Wäg is Schützehüsli gfunge was mi natürlech sehr gfreut het.
Ir Wärchstatt vom Kessler Uli hei mr de am 21. Oktober Gwehr putzt so das mir am
24. Oktober z Ändi vom Kurs mitem Schlussobe hei chönne us lütte.
A däm Obe hei natürlech aui uf d Rangverkündigung blanget. I ha das Johr de Jungschütze sehr schöni Prise dörfe übergä a dere Steu möcht i am Wälti Kurt nomou viu mou merci säge är het üs die Prise füre Jungschützekurs 2009 gsponseret merci no einisch. Wesech öber a gschproche füeut u d Jungschütze chlei wett ungerstütze füre Kurs 2010 isch no aues offe.
Zu de Resultat! Ufem erschte Rang isch dr L`Heureux Christian mit 299 P är isch zudäm ou grad dr Gwinner vo üsem Wanderpris wo dr bescht Jungschütz vom zwöite Kurs uszeichnet gsi.
Ufem zwöite Rang isch d Frei Annina mit 297 P.
Füre dritt Rang hei zwe drum Kämpft dr Schädeli Fabian und dr Beck Dominique mit je 292 Punkt.
I ha de da mir ä Jungschützekurs si beid mitemne Pris Uszeichnet.
So i chume zum Schluss i wett no mou aune merci säge mine Spänder aune wo mir ghufe hei i däm Kurs aber ou mim Hiufsleiter am Häni Matthias äs isch super weme dä Kurs so s zwöite höch cha dürefüere merci Mattias für dini mithiuf.
Jetz wünsche i aune im Johr 2010 Guet Schuss u Gueti Gsundheit
Dr Jungschützeleiter
Häni Patrick
