GV 2014
Jungschützenbericht 2013
Wie au Johr hei dr Matthias u i dr Jungschützekurs am 13. März mitem Theorieobe mit 11 Jungschütze und 6 Juniore im Schützehuus eröffnet. I ha de ou das Johr wider ä Brief vor Burgergmein übercho wo a gfrogt isch worde ob D Jungschütze ou hüür wider am Waldsetztag würde häufe.I ha se de a däm Obe drüber orientiert u gli druf isch klar gsi das mir wider mitmache.U so hei sech am 6. April 12 Jungschütze am Morge am achti im Waudhuus besammlet gha für cho zhäufe.Äs isch wider ä glungnigi sach gsi äs isch viu gret worde vilech ou chle plagiert aber am Obe si 2516 Pflanze gsetzt gsi u mi het gwüsst gha was me dr ganz Tag gmacht het.I möcht mi doch bi aune Jungschütze bedanke wo a däm Tag mitghufe hei u d Schützegseuschaft bi däm Pflanztag verträte hei, merci.
Nachem vierte Schiesstag isch de z`Balmeggschiesse ufem Programm gsi wo mir doch mit 11 Jungschütze hei teilgno. Äs isch de viu nöis gsi für se, zersch ligt me im Bitz usse wo vilech chlei füecht isch gsi, u när sekle Zeiger no usem grabe für cho s zeige. Z`beschte Resultat het dr Engeli Yanick mit 44 Punkt gha.
Nach däm Tag het me sech de witer am Kursprogramm gwitmet und so isch z Fäudschiesse am 1. Juni z`Busswil langsam aber sicher nöcher cho.Nün Jungschütze hei a däm Tag mitemne Kranz chöne uszeichnet wärde die beschte Resultat, dr Müller Silvan 60 P dr Engeli Yanick , Maurer Jeanne-Sopie und dr Brunner Fabian je 57 P dene Kranzgwinner härzlechi Gratulation zu dene guete Resultat.
Vor de Summerferie si mr de Mitti Juni uf Meinisberg as Jungschützewettschiesse gfahre.
Üse bescht Jungschütz dr Schmid Timon isch mit 83 P ufe 11. Rang klassiert worde und dr Müller Silvan mit 81 P het dr 16 Platz beleit gha. Bi de Juniore isch dr Brignoli Luca mit 87 P ufe 2. Rang cho .
Insgesammt si 8 Jungschütze mitem Kranz uszeichnet worde.
Härzlechi Gratulation am Luca zu däm zwöite Rang u aune Kranzgwinner.
Wäge mire Abwäseheit het dr Häni René am 30. August mit 3 Jungschütze und 6 Jugendliche dr Wäg nach Mühleberg unger d Reder gno für mit ihne dört z`Seeländische z beschtritte.
Bi de Jungschütze isch dr Meier David mit 88 P ufe 6 Rang cho dr Schmid Timon mit 80 P ufe 24 Rang und dr Gurtener Florian mit 79 P ufe 27 Rang.
Bi de Juniore 5 Rang mit 84 P Maurer Jeanne-Sopie 7 Rang mit 83 Bricnoli Luca 11 Rang mit 81 P Engeli Yanick 16 Rang mit 76 P Ramseier Marcel 19 Rang mit 71 P Amstutz Brayan und ufem 27 Rang mit 64 P dr Meier Tim.
I möcht am René nomou merci säge das er dä Samschti gopferet het und mit dene 9 Jungschütze uf Mühlebärg gfahre isch merci viu mou.
Am 5 + 6 Oktober heimer de Lottomatch gha i möchti aune Jungschütze für ihre Isatz a dene zwene Tage rächthärzlech Danke, merci.
Nachem Usschiesse hei mir bim Kessler Uli wider dörfe go Gwehr putze merci Ueli das Du üs wider dis Garage hesch zur verfüegig gschteut.
Am 26. Oktober hei mir de üse tradizioneu Jungschützeschlussobe düregfüert. Nachemne feine Raclette het natürlech d Rangverkündigung nid dörfe fähle, dank äm Wälti Kurt ha i ou das Johr mine Jungschütze wider ä sehr schöne Pris dörfe überreiche. Kurt i möcht mi bi Dir nomou bedanke für dä schön Batze wo Du üs gspändet hesch merci viu mou. Ufem erschte Rang vom Kurs 2013 mit 326 P isch dr Müller Silvan gsi gfougt ufem zwöite Rang mit 321 P dr Schmid Timon und ufem dritte Rang dr Brignoli Luca mit 312 Punkt. Dr bescht vom zwöite Kurs wo jo aui Johr mit üsem Wanderpris uszeichnet wird isch das Johr dr Müller Silvan mit 384 Punkt gsi.
So jetz bini am Schluss vo mim Bricht a glangt i möcht mi bi aune bedanke wo mi das Johr im Kurs ungerstützt hei bsungers bi mim Hiufsleiter am Matthias für sini tatkräftigi mithiuf im Kurs merci, jetz wünsche i Euch aune für die kommendi Saison Gueti Gsundheit und GUET SCHUSS.
Dr Jungschützeleiter
Patrick Häni
